Seeɓ
Ɓëy ndút húmú yíih lomi jéní misiga homuu ɓëewë leegi bee ra. Daa wa na húmú payru affi wa laahin, wa seeɓe koleelli wa a bídë yí wë
Seeɓ a séꞌ
Ɓëy Ndút húmú hoñci seeɓuu biti yaꞌ yi wa sampi hëbëŋ légéyí meeyya. Wahtu ya na húmú seeɓuu wa ra daa wa ƴeh :
- Koope mín homa toɓ sah, ɓëewë koloh elek ɓeɓ jépíllí wë a lampa yi wa ñee toba saañ kehel, mbée wa téebíɗ húlúɓɓë ƴobe koleella af ɗeefa wa home saam ñam.
- Bee tílté níi pím fë ɗúhíɗté íl rë, daa jamono waset ɗeefa Kehel fa líssí caak muluɓ. Wasedi baaha daa na pagu níi mulii laaha ëylëh caak pëtëkúnín.
- Bee pëtëkún lahte ra nék, ɓëewë gapaꞌ poyi laaha ɓeɓ juunni wa ñéerëꞌ k´éeníɗ bëhëer fë sarap koleel fa.
- Filoon fi baaha raa, wa ɓeɓ séꞌ yí wë ɗeefa laaha yop, wa ham koleel caak sah.
- Laaha ɓaatti yop níi koleel fa ɗúhíɗ ñíinní wë sun fi mulaa raa, ɓëewë baf wa.
Ɓoorsoh
Ɓoorsoh non iña lukki lah solo koy ki ndút në rë
Bee iña nonte merees ra, ɓëy Ndút húmú dëekúu dëekëe ɓéeɓ gapaˈ ɓoorsoh hawi raɓɓa na yahu gañcaha ra. Ɓoorsohi baaha daa na wonuu hek.
Kas
Ɓëy Ndút húmú kéldúuté kíilë déˈ ! Ndah di na haaluu wa líƴ wa bok ɓéeɓ bok nuf goneel ílíƴƴë nay waa sohe too súuné, mbée pím mbée yin kay ra, wa bokuu nuf ɗaaha biti lah lúurëh fí ñogol wa biti iña meeyya non. Tahte níi mani yii baa lahe rek, wa yíppí dëekëˈ, wa koloh a ganaayyi wa múkíl heedi lúurëh fë na ñogol wa ra. Ɓoorsohi baa daa na wonuu hek, te ri húmú non yee tah líƴ na wun ra.
